BİNƏ ATÇILIQ MƏRKƏZİNDƏ "YORĞA ATLARIN AZƏRBAYCAN ÇEMPİONATI" KEÇİRİLİB


Binə Atçılıq Mərkəzi Azərbaycan Respublikasında ilk dəfə təşkil olunan yorğa yarışlarına ev sahibliyi edib. 

Azərbaycan Respublikası Atçılıq Federasiyasının təşkilatçılığı və təşəbbüsü ilə təşkil olunan "Yorğa Atların Azərbaycan Çempionatı" saat 13:00-dan etibarən başlamışdır. 

Yarışlarda paytaxtdan və digər bölgələrdən 50 - ə yaxın yorğa atlar iştirak edir. 

6 yaş və yuxarı Yorğa atların 1600 metr məsafəyə qaçışı ilə başlayan ilk yarış Sabirabaddan yarışa qatılan, sahibi Nuriyev Rəhman olan "Şimşək" ləqəbli at olmuşdur. 

İkinci qaçış 3 və 4 yaş yorğalar arasında 1600 metr məsafəyə qaçış ilə davam edib. Bu qaçışın qalibi yarışa Gəncədən qatılan, sahibi Məmmədov Cavid olan "Qəmlo" ləqəbli at olmuşdur. 

Üçüncü qaçışda 9 baş yorğa at öz gücünü sınayıb. Bu qaçışda isə, qalib çempionata Gəncədən qatılan, sahibi Həsənov Müzadil olan "Şəbdiz" ləqəbli at olmuşdur. 

Dördüncü qaçış 6 yaş və yuxarı yorğalar arasında 2400 metr məsafədə baş tutub. Qaçışın nəticəsinə görə birinci yerin sahibi yarışa Gəncədən qatılan, sahibi Əliyev Müşfiq olan "Kabus" ləqəbli at olmuşdur. 

Beşinci qaçış 7 yaş və yuxarı Yorğa atların 3200 metr məsafəyə qaçışı ilə davam etmişdir. Bu yarışın nəticəsində qalib çempionata Gəncədən qatılan, sahibi Əliyev Samir olan "Sapsan" ləqəbli at olmuşdur. 

Nəhayət "Yorğa Atların Azərbaycan Çempionatı"nın son qaçışı 7 yaş və yuxarı yorğa axta atların 3200 metr məsafəyə qaçışı ilə yekunlaşıb. Bu yarışda qalib yarışa Laçından qatılan, sahibi Ələkbərli Xətai olan "Qarabağ əsəri " ləqəbli at olmuşdur. 

Yarışın qaliblərinə Azərbaycan Respublikası Atçılıq Federasiyasının prezidenti cənab Elçin Quliyev və Federasiyasın vitse-prezidenti Elşad Abbasov tərəfindən diplomlar və kuboklar təqdim edilmişdir. 

6 qaçışdan təşkil olunan Yorğa çempionatının ümumi mükafat fondu 7700 manat təşkil etmişdir. 

Yorğa atların ilk rəsmi çempionatı olmasına baxmayaraq, yarışları izləməyə çox sayda tamaşaçı gəlmişdir. Artıq Azərbaycan Respublikası Atçılıq Federasiyasının prioritet məsələləri sırasına daxil edilən yorğa atlar üzrə yarışlar növbəti illərdən daha geniş miqyasda təşkil olunacaqdır.