SEYİD MUSAYEV “GİLAS” LƏQƏBLİ ATLA “ARAF KUBOKU”NUN QALİBİ OLDU


25-26 sentyabr 2020-ci il tarixlərdə Binə Atçılıq Mərkəzinin açıq manejində ilin növbəti konkur yarışları keçirilib.

“E”, “L” və “M**” kateqoriyaları üzrə təşkil olunan “ARAF” kuboku turnirində Azərbaycanın müxtəlif atçılıq klublarının yeniyetmə və yetkin yaş qrupları üzrə idmançıları iştirak edib.

İlk yarış 25 sentyabr tarixində saat 12:00-dan etibarən başlamışdır. “E” kateqoriyası üzrə 80 sm hündürlükdə qurulan maneələrdən ibarət yarışda 20 yaşadək idmançılar yaş məhdudiyyəti qoyulmayan atlarla, 20 yaşdan yuxarı idmançılar isə 6 yaşadək olan atlarla iştirak ediblər. 12 idmançının 16 atla iştirak etdiyi mübarizədə “Elite Horse&Polo Klubu”nun idmançıları, Ramil İbrahimov “Alart S” ləqəbli atla 1-ci, Məhəmməd İskəndərov “Cera 59” ləqəbli atla 3-cü yerin sahibi olub. “Respublika Atçılıq və Müasir Beşnövçülük üzrə İxtisaslaşdırılmış Olimpiya Ehtiyatları Uşaq-Gənclər İdman Məktəbi”nin idmançıları Emin Rzayev “Light Limerick” ləqəbli atla 2-ci, Elman Rzayev “Ak’s Clientus” ləqəbli atla 4-cü yerin sahibi olub.

Günün 2-ci yarışı saat 14:00-dan etibarən başlayıb. “L” kateqoriyası üzrə hündürlüyü 110-115 sm olan yarışda 14 idmançı 20 atla iştirak edib. Nəticədə “Buta Golden Atçılıq İdman Klubu”nun idmançısı Eqor Morotskiy “Astrello” ləqəbli atla 1-ci yerin sahibi olub. 2-ci yerdə “Francesco” ləqəbli atla “Omar” Atçılıq Klubunun idmançısı Kənan Novruzov qərarlaşıb. “Gilan Atçılıq Klubu”nun idmançısı Rahib İsmayılov “Welga” ləqəbli atla 3-cü yerin sahibi olub.

Nəhayət, 26 sentyabr tarixində saat 11:00-dan etibarən “ARAF” kuboku uğrunda mübarizə baş tutub. “M**” kateqoriyalı 125-130 santimetr hündürlükdə yerləşdirilmiş maneələrdən ibarət yarışda 7 idmançı 13 atla iştirak edib.  “Sərhədçi Atçılıq İdman Klubu”nun idmançısı Seyid Musayev “Gilas” ləqəbli atla öz rəqiblərinə qalib gələrək “ARAF” kubokunun sahibi olub. “Elite Horse&Polo Klubu”nun idmançısı Pənah Əlizadə “Cera 59” ləqəbli atla 2-ci, “Buta Qolden Atçılıq İdman Klubu”nun idmançısı Eqor Morotskiy isə “Astrello” ləqəbli atla 3-cü yerdə qərarlaşıblar.

Qaliblərə Federasiyanın vitse-prezidenti Bəsirət Quliyev tərəfindən diplomlar təqdim olunub.