Azərbaycan
Respublikasının müzəffər Silahlı Qüvvələri, qəhrəman hərbi qulluqçuları Azərbaycan Respublikasının Prezidenti cənab
İlham Əliyevin Ali Baş Komandanlığı altında erməni işğalçılarından
torpaqlarımızı azad edir, hər bir ölkə vətəndaşının, hər bir azərbaycanlının ən
ümdə arzusu və istəyi olan - Böyük Qələbəni anbaan yaxınlaşdırır.
Azərbaycan Silahlı Qüvvələrinin qətiyyətli əks-həmlə tədbirləri
ilə Cəbrayıl, Füzuli, Zəngilan, Qubadlı rayonlarının böyük hissəsi (rayon
mərkəzləri və kəndlər daxil olmaqla), Xocavənd və Xocalının bəzi kəndləri və nəhayət
Şuşa şəhəri işğaldan azad edilmişdir.
Hazırda ölkəmizdə bütün dövlət qurumları, təşkilatlar,
sıravi vətəndaşlar torpaqlarımızın bütövlüyü uğrunda vuruşan Silahlı Qüvvələrimizə
öz maddi və mənəvi dəstəklərini nümayiş etdirir.
Azərbaycan Respublikasının Atçılıq Federasiyasının bir
neçə idmançısı da hazırda cəbhənin müxtəlif istiqamətlərində düşmənə qarşı
qorxmazcasına mübarizə aparırlar.
Həmin şəxslərdən biri, jokey Hilal Nəzərov 28 sentyabrdan
etibarən ön cəbhəyə yollanıb. O, düşmənə yaxın mövqedə, xüsusi əməliyyatlarda
iştirak edərkən yaralanmışdır.
Dövlətimizin yüksək maddi-mənəvi dəstəyi ilə əhatə
olunmuş Hilal Nəzərovun özünə və ailəsinə əlavə qayğı göstərmək məqsədilə Azərbaycan
Respublikasının Atçılıq Federasiyasının Prezidentinin tapşırığı ilə Federasiyanın
baş katibi Bəhruz Nəbiyev Şirvan Şəhər Mərkəzi Xəstəxanasında Hilalı ziyarət
etmişdir.
O, əsgərimizə Federasiyanın prezidenti adından döyüşlərdə
qəhrəmancasına iştirakına görə təşəkkür etmiş və hər bir məsələdə Atçılıq
Federasiyası olaraq daim yanında olduqlarını bildirmişdir.
Azərbaycan Respublikasının Atçılıq Federasiyası bütün
atçılıq ailəsi adından Vətən uğrunda canlarından keçmiş şəhidlərimizə Allahdan
rəhmət diləyir, yaralılara isə tezliklə öz sağlamlıqlarına qovuşmağı arzu edir.
